Alltag in Singapur

Hoi mitenand

Das mol gits nöd so viel z'brichte, isch jo au nöd viel Zit vergange...
Die Wuche bin ich wieder brav am schaffe, schaffe, Brötli backe gsi und han näbät bi no mini 1000 Sächeli erlediget.
S'erste Highlight isch am Mäntig gsi, woni endli endli noch 3 Mönät mol wieder mit mim Müggi han chöne telefoniere. Di technisch Revolution, au Skype gnennt, het au bi ihre Izug ghalte und ich han mich wahnsinnig gfreut sie wieder mol z'ghöre!
Am Donstig bin ich denn gsi go Fondue esse (jo ihr lesed richtig). Es git am einte Standort idä Stadt amigs en Swiss Lunchall zwei Wuche. Ich chan leider nöd goh, well ich jo recht usserhalb schaffe. Jetzt het aber dä Organistor vo dem Zmittag es Wienachtsesse im Swiss Club organisiert. Mä muen vilicht no däzue sägä, dass dä Swiss Club do sehr exklusiv isch und d'Mitgliedschaft es Vermöge kostet. Uf all Fäll sind mir am Donstig denn öpe z'30igste döt go Fondue esse gsi. Es isch en sehr schöne Obig gsi und ich hans gnosse. S'Fondue isch also au sehr guet gsi und es isch sogar Kirsch uftischet worde :-)
Am Fritig isch denn grad s'nöchste Esse agstande und zwar hend mir vo üsem Departement us Wienachtsesse gha. Da isch do chli anders, insofern dass jede selber zahlt und dass d'Locals sehr gern gönd go Buffet esse. Mir sind also im Oscar's gsi, das isch s'Restaurant vom Conrad, wo anschinend s'einzige 6 Stern-Hotel in Singapur isch. Dementsprechend isch es au sehr fein gsi, es het Austere, Sashimi etc. geh. Und es isch natürli au super gsi, zum sich mit dä Lüt mol usserhalb vom Büro z'unterhalte und sie besser kennezlerne.
Gest Obig sind mir denn id Rooftop-Bar vom Fullerton Bay Hotel. D'Ussicht döt isch würkli traumhaft, mä gseht über di ganz Marina Bay (tuen eu no Föteli ahenke). Es isch sehr en gmüetliche Obig gsi.
Hüt han i (endli) zwei Sache gmacht, woni scho han wölle mache sit i acho bin. Ich bin gsi go brunche, wa do sehr gängig isch. Und denn bin ich zum erste Mol im Pool gsi!!! Jo, ihr ghöred richtig, ich, wo d'Hotels gern noch em Pool ussuecht bin i dä letschte 4 Wuche no nie dine gsi ;-)
Ich hoffe, eu gohts allne guet und ihr sind nöd z'fest im Wienachtsstress... Falls mir üs bis döt anä nöd no ghöred, wünschi eu ganz schöni und besinnlichi Festtäg mit eune Liebste und bin i Gedanke bi eu.
Liebi Grüess,
M.

Abentüür in Singapur und Indonesie...

Mini Liebe

Als ersts e mol e grossi Entschuldigung, dass ihr so lang nünt meh vo mir ghört hend! Wani gmacht han, dass i so lang kei Zit gha han, chunt grad.
Am Mittwuch noch mim letschte Post (1.12.) hend d'Michelle und ich üs spontan entschide zum s'nöchste Wuchenend weg z'goh. Gesagt getan, hend mir es Bintan-Package buechet. Bintan isch e indonesischi Insle wo inere Stund per Fähre vo Singapur us erreichbar isch. Am Fritig sind mir denn direkt noch em schaffe as Ferry Terminal idä Nöchi vom Flughafe und hend nochem Ichecke zerst mol dä Duty Free unsicher gmacht. Das macht vor allem Sinn, well dä Alkohol do in Singapur recht tür isch (Bier gern 7-8 SGD) und Bintan sich a singapurer Prise agliche het. Aschlüssend hend mir denn au grad mit some beseite Bierli uf üsen Trip agstosse und sind uf d'Färe. Nochere recht turbulente Fahrt, uf dere sogar mir usnahmswiis schlecht worde isch, sind mir denn am 8i in Bintan acho. Praktischerwiis (zumindest uf em Hiiweg) het Bintan -1 Stund Ziitväschiebig zu Singapur.
Am Terminal uf dä Insle sind mir denn mit em Bus abgholt worde und noch witere 20min im Hotel gsi. Noch ichecke und Zimmer bezieh, hend mirs denn fertig brocht zum im susch zuäne Resort no öpis Znacht bsorge.
Am Samstig sind mir zwar zitig ufgstande, hend aber nur graui Wulche und Regetröpfli gseh. Also hend mir üs für chli wellnesse entschiede. Leider het mich fast dä Schlag troffe woni d'Priisliste im Hotel aglueget han (90-100 SGD für ei Stund Massage). Kurzentschlosse sind mir also an Activity Desk und hend gfroget wamer sust no chan underneh wenns regnet. Dä netti Herr het üs denn direkt en Termin ime Spa ca. 15min usserhalb vom Ressort buechet. Also sind mir mit em Hotelbus losgfahre und nochdem mir denn endli hend chöne zahle (4 Kreditkarte sind vo 3 Grät nöd akzeptiert worde, wer het denn so öpis scho mol erlebt???), isch es los gange. Mir hend üs zahlti 3, effektivi 4 Stund mit ere Aromatherapie Massage, anere Gsichtsbehandlig und ere Manicure väwöhne loh.
Wo mir denn is Hotel zruggcho sind, het scho d'Sunne duredruckt und nocheme erste Gläsli Wii sind mir denn an Strand go spaziere und aschlüssend ad Strandbar go dä Sunneuntergang luege.
Am Suntig isch denn traumhafts Wetter gsi (natürli sind d'Föteli denn gmacht worde :D). Nocheme witere Spaziergang und e chli bädele hend mir denn no agfange Bodyboarde. Für die wo nöd wüssed wa da isch, da sind die komische Lüt wo uf eme chline Brett liged und vorzugswiis uf dä Welle sind ;-) Noch 1.5 Stund und ere schüche Röti i mim Gsicht, hend mir üs denn erschöpft uf em Liegestuehl niederloh und no Zit bis zum uschecke gnosse.
Am früene Obig sind mir denn zrugg noch Singapur gfahre und schliessli bin ich erst zimli spot dihei gsi.

Und am Mäntig isch dä Arbetsalltag wieder los gange.
Jo, s'Schaffe isch scho sehr zur Routine worde, ich dörf aber immer no sehr viel lerne und d'Lüt nehmed sich au Zit zum mir Sache erkläre und zeige. Glichzitig glaubi au, dass i min Bitrag chan leiste und sie entlaste. Da isch v.a. wichtig, well do momentan Hauptferiezit isch - sie hend jetzt au grad 1.5 Mönät Schuelferie.

Jetzt stellt sich natürli no d'Frog wani letscht Wuchenend gmacht han, damit i eu nöd han chöne schribe...
Am Fritig isch d'Myriam 30gi worde. I han sie scho idä Schwiiz kennt und mir undernähmed do au öfters öpis. Mir sind zerst mit dä Girls zum Apero und go esse. Aschlüssend hend mir denn d'Jungs inere Rooftop-Bar idä Nöchi vom Chinatown troffe. Vilicht no kurz zur Erklärig... Usgang isch do chli andersch als idä Schwiiz. Mä goht sehr viel go esse und nochanä eifach no inä cooli Bar. Da isch recht friedlich und oft vähocked mir denn recht lang.

Am Samstig bin ich dementsprechend erst chli spöter ufgstande und han denn mösse es paar Bsorgige erledige. Jo, poste etc. mues mä do au! Am Obig isch denn d'Michelle zu mir cho und mir hend Apéro gmacht und gesse bi mir. Spöter hend mir no Tickets fürs Zouk Out gha. Da isch e Festival/Strandparty uf Sentosa Island (vorlagereti Insle vo Singapur, bequem mit em Taxi zerreiche). D'Musig isch hauptsächlich Elektro und v.a. House gsi, es isch aber super gsi. Weniger super gsi sind die Masse vo Lüt wo eim scho am Igang erwartet hend. Irgendwenn spöter am Obig hend mir denn wölle öper treffe wo ganz am andere End anere Bargsi isch. Mir sind i dänä Menschemasse würkli nümä fürschi oder hinderschi cho, dass mir doch Panik übercho han und mir denn bald drufabä gange sind.
Isch aber alles in allem en Erfahrig gsi, womer mol muen gmacht han. Vor allem hets eim mol es anders Bild vom cleane Singapur vämittlet. Mä het Lüt gha, wo uf em Troittoir ghocked sind und drunke hend, es sind scho es paar am Strand am schlofe gsi etc. ;-)


So hani denn am Sunntig au nüme extrem viel undernoh, bin no chli adä Orchard go Schaufenster bummle und zum Coiffure. Und jetzt het gest wieder d'Arbetswuche agfange.


Ihr gsehnd also au do het sich i dem Monät(!!!) woni jetzt scho do bin, dä Alltag igschliche. Wa eigentli au e gueti Sach isch, well mä sich denn glich wohler und e bitzli meh dihei fühlt.
Für en Uflockerig i dem Alltag sorged diversi Wuchenendusflüg wo mir momentan am plane sind. D'Michelle und ich hend üs uf Bintan so super västande, dass mir üs entschiede hend au witerhin Zit mitenand z'väbringe *scherz* und grad no es paar witeri Trips z'bueche. Meh däzue gits natürli do - sobalds sowiit isch.

Ich wünsche eu idä verschneite Schwiiz witerhin e besinnliche Adventszit und bin i Gedanke bi eu,
M.

Definitiv acho

Hoi mitenand
Wie dä Titel scho seit, bin ich jetzt definitiv do in Singapur acho. Ich han nämli gest chöne mini Arbetsbewilligung go abhole! S'schönste dra isch, dass ich per sofort am Flughafe nüme muen astoh, sondern bidä Residents chan inä :D
Sust wird s'Lebe do langsam zum Alltag, under dä Wuche wird gschaffet. D'Arbetszite sind chli andersch wie ich amigs idä Schwiz schaffe, das heisst ich fang so am 9i ah und schaffe däfür bis am 7ni, halb 8i am Obig. So bin ich amigs erst so am halb 9i dihei und es väschiebt sich halt dä ganz Tag noch hindere. Am Mittag gang ich meistens mit dä Joyce (sie führt mich ih im Büro) go esse und probiere dementsprechend au viel väschiedeni Sache (nöd immer guet, aber immer en Väsuech wert).
Ab em Mittwuch, noch öpä 4 Täg Ifüehrig und zuelose, han ich denn au scho ihri Stellvertretig übernoh und bin nöd unfroh, dass sie am Zistig wieder chunt...
Denn chan ich no Entwarnig geh a alli wo sich mis Schimmel-/Wasserschade-Problem hend dörfe alose! Nochdem ichs letscht Samstig gmolde han und s'Housekeeping väbi cho isch (wo natürli au nünt het chöne mache, wer heti das denkt!?), hend sie denn uf dä Mäntig dä Spezialist bstellt. Dä isch denn no krank gsi, aber am Zistig cho und het die ganz Sach behobe. Am Mittwuch sinds denn nomol cho und hend di ganz Decki gstriche. Als i-Tüpfli han ich denn no Blueme und en Früchtekorb becho. Ihr gsehnd also, ich bin beruhigt und z'fride und hoffe ihr sinds au...
Wör mi freue mol z'ghöre wies eu so goht und wa ihr so tribe...
Ganz liebi Grüess,
M.

1. Wuche

Hoi mitenand
So, die erst Wuche isch mittlerwile au väbi. Ich han am Mäntig Onboarding gha und bin denn am Zistig s'erst mol im Büro gsi. S'Büro isch idä Nöchi vom Flughafe, d.h. ich bruch e knappi Stund vom Appartement is Büro. Isch natürli chli länger wie dihei ;-)
Ich han bim schaffe momentan en Ifüehrig und bin vo dem her no viel am zuälose. Mir hend im Väglich zu andere Abteilige praktisch nur Locals, ein andere Schwiizer Trainee gits no- ich finds super.
Am Zistig Obig isch Singapore Staff Party gsi. D'Location uf dä Floating Platform isch super gsi und ich han no meh Lüt kenneglernt.
Am Mittwuch isch denn en Firtig gsi. Dä chani gnutzt um d'Umgebig vo mim Appartement e chli z'erkunde. Es het (wie fast überall in Singapur) meheri Malls idä Nöchi und d'Arab Street sprich s'Arabische Viertel isch au grad gegenüber.
Gest bin ich denn go d'Orchard Road erkunde und chli go shoppe :o) Am spötere Nomitag denn witer in Chinatown zur Massage. Ihr gsehnd also, ich los mir guet goh do...
Hüt bin ich mit eme Kolleg zerst noch Sentosa (vorglagerti Insle, Noherholigsgebiet). Es isch dä Wahnisinn wa sich döt i chli meh als ämä Johr doh het! S'letscht Mol isch es abgseh vom Aquarium und em Akunftspunkt meh oder weniger nur Strand gsi und e chlini Baustell. Mittlerwile gits mehreri Hotelalage, es Casino und en Universal Themepark!!! Es isch echt dä Wahnsinn! Sie hend innerhalb vomä Johr ufgschüttet und baut wie die Wilde.
Aschlüssend sind mir denn no noch Chinatown, hend döt under anderem dä Buddha Tooth Relic Temple und dä Sri Mariaman Temple aglueget. Bsunders Merkmol vom erste: er het en eiges unterirdisches Parkhuus ;-) Das chunt doher, dass er au neu isch (2008 eröffnet). Dä zweit isch dä ältist Hindutempel in Singapur und sehr idrücklich.
@Regu: Han en neue Wonton Place imä Hawker Center gfunden. Die mached d'Nudle und d'Wontons frisch wennd bstellsch! Isch echt dä Knüller, mir mönd denn unbedingt goh...
Noch acht Stund umälaufe bin ich jetzt kaputt und gnüss no dä Rest vom Obig. Ich wünsch eu allne en guete Start idi neu Wuche.
 So long,
M.

Acho

Mini Liebe,
Ich bin guet in Singapur ancho.
Dä Flug isch guet und relativ ruhig gsi. Mä chönt sogar sensationell sägä, wenn ich dra denke, wieni väwöhnt worde bin, mit ämä Bett und eme (fascht zu) grosszügige Umgang mit em Champagner :-D
Au nochanä het alles super klappet. Mini Wohnig het scho uf mi gwartet (Föteli sind unä). Nochämä kurze Nickerchen und aschlüssendem Uspacke, han ich mich denn uf d'Suechi noch es paar Grundnahrigsmittel gmacht. Die nöchst Mall isch also nur ca. 7min z'Fuess vo mir weg (d'Frog isch öb da guet isch oder schlecht...).
Am Obig han ich mich denn mit ere alte und es paar neue Kolleginne zum Drinks und Esse troffe. Dä Samstig isch denn ähnlich väbi gange. Es paar Bsorgige und Käffäle dä Tag dur und am Obig isch denn no en Kolleg acho und mir sind noch Little India go esse. Ich weiss jetzt also us erster Hand, wieso mä ehner under dä Wuche döt anä söt. Es isch sehr volle am Wuchenend, well di Iheimische und d'Gastarbeiter frei hend. S'Zentrum vom Gscheh, s'Mustafa Center isch so überfüllt gsi, dass üs erst bim 4. Igang inäloh hend.
Dä Suntig isch denn au no mit mich irichte und es paar Dumplings zum Znacht väbigange.
S'Jet Lag isch also väbi und hüt Morge het mit em Onboarding dä Ernst vom Lebe wieder agfange.
Ihr gsehnd also, es goht mir guet und ich bin mi am Igwöhne.
Bis bald!