Bangkok

Hoi mitenand 

Wie versproche chunt jetzt d'Fortsetzig vo mine Abendtür do in Singapur und Umgebig.
 
Nochdem mir am Mittwuch vo Vietnam zrugg cho sind, hani no schnell mösse wäsche, dohs am Fritig Obig scho wieder witer gange isch noch Bangkok. Jo, ich weiss, s'Lebe isch kein Sugus ;-)

Ich bin also am Fritig noch em schaffe mit dä Michelle uf Bangkok gfloge. Bis mir denn im Hotel gsi sind und icheckt hend, isch es au scho 1s gsi, also sind mir eifach no schnell uf di Hoteleige Rooftop Bar eis go zieh. Wo mir denn zu nächtlicher Stund hend wölle is Bett goh, hend mir festgstellt, das bi beidne (!) Better d'Lacke dreckig gsi sind. Und dass im Four Points by Sheraton' isch echt unglaublich. Und s'beste isch am nöchste Morge hend mirs gseit und womer wieder zruggcho sind, isch es immer no dreckig gsi!

Am Samstig Morge sind mir denn ufbroche und hend Bangkok erkundiget. Wagemütig wie mir sind, sind mir grad z'erst an Chao Phraya River abä und hend eis vo dänä chline Bötli gnoh zum zum Grand Palace & Wat Prakeaw ufä fahre. Hinder üs sind zwei Engländerinne ghocked, die hend bi jedem bitzli schaukle oder sprütze kreischt :-P Wo mir denn bim Palast acho sind, hend mir z'erst mol mösse go langi Hose / Rock kaufe. Mir hend zwar beidi gwüsst, dass mä das brucht zum ihne goh, ich bin aber dävo usgange, dass mä das au in Thailand, wie überall sust, chan bim Igang uslehne. Nochdem ich also für THB 200 no en Lumpe erstande han, isch es denn losgange…
Es isch würkli sehr idrücklich die Paläst und Tempel go ahluege und au wie guet sies erhaltet. Anderersits hani mi denn glich au mösse froge, wie viel Geld dass do in Unterhalt wohl inägsteckt wird und wie viel Lüt i dem Land echt Hunger hend…
Aschlüssend isch denn natürli no s'Klassische für Thailand passiert. Mir hend witer wölle zum Wat Pho und sind i diä Richtig am laufe gsi, wo üs eine vo dä 'Touristepolizei' agsproche het und gfroget het öb er üs chan helfe. S'End vodä Gschicht isch gsi, dass mir inäs Tuk-tuk verfrachtet worde sind und zumä völlig abglegne Bootssteg gfahre worde sind. Döt hends üs e völlig überrissni Tour abote, womer natürli dankend ablehnt hend und dävo gloffe sind. Alles in allem isch es halb so schlimm gsi, well mir es billigs Tuk-tuk gha hend (isch jo schliessli dä Köder gsi) und denn au grad bim Tempel gsi sind, wo mir jo hi hend wölle :D
Aber es hät üs glehrt, dass Thailand wad Touristeabzocki abelangt scho en anders Kaliber isch wie Vietnam oder Malaysia.
Noch dä Besichtigung vom Wat Pho und em Reclining Buddha wo d'Hauptattraktion isch, sind mir denn mit dä Fähre über zum Wat Arun (au dä The Temple of Dawn gnennt). Da isch würkli schön gsi. Nur leider han ichs gschafft zum mir bim bestiege resp. bim abstiege vo eim vo däne Türmli e Zerrig I beidne Oberschenkel z'hole. Jo, ich weiss, es isch mol wieder typisch. Aber ich han nochanä echt 3 Täg jedi nöd motorisiert Stägä mösse miide ;-) Dä Tigerbalsam (wo apropos ursprünglich us Singapur chunt) hät schliessli Abhilf brocht.
Mir sind denn vom Wat Arun zunäre stündige Schifflitour uf em Chao Phraya River und diverse Kanäl ufbroche. Isch super gsi, au die Konträst zwüsched grosse, riche Hüser und dä alte Holzhüttli z'gseh. Underwegs sind mir au no am Floating Market verbi cho, vo dem ich ehrli gseit meh erwartet han… Alles in allem isch es e sehr entspannti Stund gsi (abgseh vo dä Moment womer gmeint hend, s'Boot kippi oder fahri inä Wand).

Am Obig sind mir denn frisch gstrigglet und gstrählet is Vertigo go Znacht esse. Da isch d'Rooftop Bar vom Banyan Tree Hotel. Für die wos interessiert, do dä Link: http://www.banyantree.com/en/bangkok/dining/vertigo_and_moon_bar/ Isch würkli suupeer gsi! S'Esse isch sehr fein gsi und dä Service isch au top. Mir sind scho uf di 6i ufä und hend so au no chöne dä Sunneuntergang (und di entsprechende Mugge *g*) gnüsse :D Wells üs so guet gfalle het, sind mir denn nochem esse grad id Bar übere und hend no en Drink gnoh.
Und uf z'mol klammeret sich öpis a mim Gurt fest… Ich bin nämli grad unä anere 3, 4 Tritt Stäge ghocked… Es isch also di eint Kellnerin gsi, wo durabkeit isch und sich a mir ghebet het. Mir hend z'erst vermueted sie hegi sich öpis broche und hend sie drum grad uf üsi zwei Barhocker verfrachtet. Denn hend mir Is verlangt und glueget dass sie sich chli beruhigt. Es isch recht komisch gsi, einersits het sich niemert vom Personal sust um sie kümmeret und anderersits isch es ihne glaub sehr unagnehm gsi, dass sie jetzt uf üsne Stüehl hocked. Do d'Michelle druf beharrt het, dass sie sie zumä Arzt bringed, isch sie denn nochere halb Stund in Spitol verfrachtet worde. Sie sind üs denn au cho go säge, wo sie wieder zrugg gsi isch und d'Michelle isch denn no zu ihre abä und es isch nünt broche gsi.
So isch üsen Obig spektakulär und relativ spot z'End gange und mir sind zrugg is Hotel, wo üsi Bettlake immer no dreckig gsi sind…

Am Suntig hend mirs denn chli gmütlicher gnoh, hend gmüetlich zmörgelet und sind nochanä no chli go lädele.
 
Und denn sind mir scho idä letschte Wuche und dä Bricht folgt bald…
 
Liebi Grüess,
Marina

Vietnam und witeri Abentür...

Mini Liebe,
D’Zit rennt scho wieder devo und ihr hend scho lang nünt meh vo mir ghört.
Doch het sich einiges tue sit ich s’letschte mol gschriebe han.
 
Am Samstig vorere Wuche (19. Februar) hend d’Regula und ich wölle noch Vietnam flüge für 5 Täg. Mir hend suber kalkuliert, dass sie 2 Stund het zum uf üsen Flug transferiere. Leider isch d’Singapur Airlines mit sage und schreibe 6(!) Stund Verspötig in Züri abgfloge! Sie hend zum zweite Mol innerhalb vo ca. 2 Wuche Problem mit em A380 gha und sind am Tag vorane scho viel z’spot in Singapur abgfloge. Ich weiss au nöd, wa die für Problem mit dem Vogel hend, aber das chans nöd si.
Well ichs scho gwüsst han, wo sie no gschlofe het, han ich agfange Erkundigunge izhole wie mir d’Regula no noch Vietnam bringed und han ihre denn aglüte sobald sie wach gsi isch. Am Schluss isch alles nöd so schlimm gsi, sie isch öpe 12 Stund noch mir acho, het en züsätzliche Transport gha und mir hend üs im Hotel troffe.

Mir sind also z’erst in Mui Ne ime chline Boutiqü Hotel gsi und hend e chli bädelet unds üs güt goh loh. S’Hotel isch super gsi und d’Lüt sehr fründlich mit guetem Englisch, abgseh vo chlinere Differenze bim uschecke isch es perfekt gsi für die knapp 3 Täg. Ah, vilicht no zur Ergänzig, dass nöd alli de Atlas mönd fürehole: Mui Ne isch im Süde vo Vietnam so 4 Stunde mit em Auto oder 5-6 Stunde mit em Bus vo Ho Chi Min City (aka Saigon) weg. Entsprechend sind mir vo Singapur noch Saigon gfloge und vo döt us witer.

Döt ane sind mir denn au für witeri 2 Nächt wieder zrugg, nochdem di total Entspannig igsetzt hät.
In Saigon hend mir ime chline Hotel gwohnt. Das isch tiptop gsi und dä Workout isch au grad no inklusiv gsi, do mir im 5. Stock ohni Lift gwohnt hend ;-) Es isch super glege gsi, ca. 5 min z’Fuess vom Ben Tanh Market weg und mir hend dementsprechend alli wichtige Sehenswürdigkeite z’Fuess gmacht.
Ich muen säge, ich bin wahnsinnig begeisteret vo HCMC. D’Stadt isch erstundlich grün und me het de Idruck es het wesentlich weniger Smog als z.B. Bangkok. Es het super Sehenswürdigkeite, üs het zum Bispiel de Reunification Palace am beste gfalle. Döt het während dae Unabhängigkeit vo Suedvietnam de Präsident gwohnt (hät au dementsprechend früener Independence Palace gheisse). Am Schluss vo de Unabhängigkeit het denn d'Regierig au dötä usgharret bis d'Nordvietnamese s'Tor gsprengt händ. I mim Reisefüehrer isch gstande, dass d'Zit stoh blibe isch a dem Ort und das isch würkli so. Natürli isch das alles unkommentiert ;-)
Mä gseht au in Vietnam immer no uf de Stross riesigi kommunistischi Plakat (mueni mir denn mol übersetze loh). Allgemein merkt mä halt scho, dass es es kommunistisches Land isch – und das nöd nur well Facebook landeswiit gsperrt isch. Idä Musee isch Gschicht immer so bitzli andersch dargstellt usw.
Und dä Verkehr in Saigon isch echt dä Wahnsinn!!! Es het nöd würkli viel Autos, aber Töffli über Töff. Ich han aber mini inner Rueh gfunde woni übere 4spruigi Stross zwüsched gfühlte 100 fahrende Töffli durägloffe bin.
Es isch e sehr interessanti Erfahrig gsi in Vietnam und ich bin sicher, dass ich irgendwenn nomol für längeri Zit werd zruggcho! 

Mir sind denn am Mittwuch Obig zrugg noch Singapur gfloge und d’Regula isch no bis am Samstig Morge bi mir blibe. Meh zu dem was nochdem passiert isch spöter…

So long und ganz liebi Grüess,
Marina

Happy Chinese New Year!

Scho sind zwei Wuche wieder wie im Flug vergange.
 
Vorletscht Wuchenend han ich Bsuech gha vo mine Eltere und bin somit am Samstag i aller Herrgottsfrüehi uf de Flughafe. Immerhin han ich Gsellschaft gha vodä Sandra, wo grad ihren Fründ isch go abhole. Nochdem mir üs alli nomol kurz usgruebet hend, hend mir denn s'Wuchenend lang d'Stadt unsicher gmacht und am Suntig no am Papi sin Geburtstag gfiiret mit em obligate Bsuech im Steakhouse :-) Aber de Reihe noh (au für alli wo mi no chömed go bsueche als Vorschau). Mir sind am Samstig noch em Zmorge e Rundgang dur de Colonial District und de Central Business District (CBD) go mache. Es git würkli es paar schöni Gebäude do - alti und neui. Am Obig sind mir denn zu mim Lieblingsitaliener go esse (vgl. Wienachte), was aber glaub viel spektakulärer isch, wenn mä sit 2.5 Mönät asiatisches Esse isst wie wenn mä grad us de Schwiz chunt ;-)

Am Suntig hend mir es paar vo mine Lieblingsbeschäftigungen in Singapur gfröhnt. Zerst sind mir gmüetlich go brunche am Fluss, imä mega herzige Café / Restaurant. Da chönt grad so guet in Berlin oder Züri si, ussert dass mä Mitte Januar chan dusse sitze :D Aschlüssend sind mir am Fluss entlang noch Chinatown gange zur Massage. Dä aschlüssend Rundgang durch Chinatown isch denn liecht verkürzt gsi, wells ame Suntig (viel Lüt schaffed do 6 Täg und hend nur am Suntig frei) zwei Wuche vor em neue Johr unglaublich viel Lüt het.

Letscht Wuchenend bin ich denn zämä mit dä Michelle fürs Wuchenend noch Kuala Lumpur gfloge. Mir sind also am Samstig Morge do abgfloge und noch nur 50min scho wieder glandet. Isch echt no speziell, i han nonig mol mis Cola fertig gha, wo mir scho wieder abägange sind ;-) Nochdem mir im Hotel no inä Suite upgraded worde sind, sind mir denn loszoge um d’Stadt z'erkunde. Ich muen sägä, es git nöd uuh viel z'gseh in KL, aber mir hets sehr guet gfalle. Sie hend anschinend idä letschte Johr wahnsinnigi Fortschritt gmacht, wa d'Verbesserig vom Stadtbild abelangt. Sie fanged jetzt ah, en ähnlichi Strategie wie Singapur verfolge, wa ihren Wirtschaftsstandort betrifft. Und… ich han mich verliebt. D'Twin Towers idä Nacht sind wohl öpis vom schönste woni jeh gseh han (henk eu no e Fötli ah). Natürli sind mir au nebet de obligate Tempel und Stadtbesichtigunge, no chli go shoppe =) Am Suntig Obig sind mir denn zrugggfolge und so isch das Wuchenend au scho wieder väbi gsi.

Bim Schaffe isch alles tip top. Ich han vor zwei Wuche no s'Team gwechslet und bin jetzt wieder fliessig am neui Sache lerne.

Ich hoffe, eu gohts allne guet und wör mich freue, wenn sich au die mol melded wo da bis jetzt nöd mached :-P Ihr chönd zwar do lese wani mach, aber I chum bi eu jo nünt mit über…

Ganz liebi Grüess,
Marina

 

Bsuech und Melaka

Hellou
 
Ich hoffe, eu gohts guet dihei...
 
Ich bin recht usglastet gsi bim schaffe, do ich wieder e Stellvertretig gmacht han und freue mich jetzt sit em Samstig mini Eltere do zha.
 
Aber z'erst e mol de Reihe noh. Idä erste Januar Wuche han ich mich sehr gfreut als d'Nadine als min allerste Bsuech cho isch. Sie und ihri zwei Kollege hend sich während knappe 3 Täg Singapur aglueget und mir hend üs jewils am Obig troffe zum go esse und schwätze :-) Obwohl viel z'kurz han ich mich sehr gfreut sie do z'ha. Sie isch denn am Samstig abgreist und ich han mich glichzitig am Morge früeh mit em Lukas uf dä Weg noch Melaka gmacht.

Melaka liht im Süde vo Malaysia und isch es Unesco Weltkulturerbe, wo früener die berüehmt Stross für Schiff vo Indie noch China duregange isch. Dur das, dass sie vo de Holländer, Portugiese und Brite bsetzt gsi sind, gits schöni Kolonialgebäude. Usserdem isch interessant wiemer imä relativ chline Umkreis chan ä Kirche, än hinduistische, än chinesische Tempel und ä Moschee go aluege. Mir sind mit em Bus vo Singapur us gange (ca. 3.5 Stund, je noch Stau ade Grenze, aber sehr komfortabel) und sind dementsprechend am Mittag acho. Am Nomitag sind mir denn alli historische Gebäude sowie Chinatown go aluege und hend spöter am Fluss gmüetlich Znacht gesse. Denn isch am Samstig Obig amigs no Nightmarket. Das isch sehr lustig gsi, wells in Malaysia im Gegesatz zu Singapur nöd verbote isch Fürwerk etc. abzloh. Also hets a dem Markt (fürd Touriste us Singapur natürli :D) Knallfrösch geh. Ich muen also ehrli sägä, ich han Freud gha wie es chlises Chind zum die an Bode werfe und luege wie alli rundumä verschrecked ;-)

Letscht Wuche isch denn relativ unspektakulär verloffe, han ebe wie gseit e Stellvertretig gmacht und bin drum lang im Büro gsi. Sust hets natürli de ordentlich Bsuech i minere Lieblingswiibar no geh und sich sust mol no zum Znacht treffe. 

Letschte Fritig sind mir denn z'Dritte go Fondue esse… Inere Mall… Sehr speziell… Nochdem mir no recht Wiiswii nohgleert hend, isch s'Fondue recht fein gsi und sie hend sogar schwizer Wiiswii gha. Nochane hani allerdings glernt, was heisst wenn mä nur no wenig Milchprodukt isst und denn meint es Fondue mösse z'verspiese ;-) 

Am Samstig Morge bin ich denn am 05:45 (!) an Flughafe usä mini Eltere go abhole. Ich han mich sehr gfreut sie do in Singapur chöne z'begrüesse und han denn de Rest vom Wuchenend mit ihne verbrocht. Sie sind jetzt no bis am Donstig doh und denn warted nöchst Wuchenend es neus Abentuer uf mi :-) Aber meh dezue nöchst Wuche…

So long,
Marina