April in Singi und Umgebig

Mini Liebe
 
Langsam aber sicher neigt sich mini Zit do in Singapur z'End. Ich schaffe jetzt no chli meh als 2 Wuche und denn isch finito.

Dementsprechend han ich mich vo mine Kollege wo zwei Wuche vor mir cho sind scho verabschiedet oder werde das das Wuchenend mache. Züsätzlich han ich grad no uf die Wuche s'Team gwechslet, also isch allgemein chli Ufbruchstimmig.

Jetzt aber no dezü, was ich di letschte Wuche so triebe han do in Singpur und Umgebig.
 
S'erste Aprilwuchenend han ich noch wieder mol do in Singapur verbrocht und bin chli mini übliche Beschäftigunge nohgange. Am zweite sind d'Michelle und ich denn noch Malaysia an GP vo Sepang gfloge. Ich bin am Samstig Morge also noch KL und vo döt us mit em Auto witer noch Port Dickson. Mir hend für die eint Nacht döte ime sehr herzige Resort es Zimmer buechet gha und hends üs eifach guet goh loh. Am Suntig sind mir denn zrugg noch Sepang as Formel 1-Renne gfahre. Noch es paar Wirrige und züsätzliche Ringgit sind mir denn au döte acho und hend üsi Plätz ignoh. Ihr wüssed jo alli - ich bin nöd dä grössti Fan - aber ich muen würkli sägä Formel 1 isch e wahnsinnigs Erlebnis. Wenn mä die mol gseht durefahre ischs scho en anderi Dimension wie am Fernseh. Eine vo mine Beschäftigungen während em Renne isch gsi, dä Asphalt z'fötele. Eigentli het jo s'Auto sölle druf, aber ebe, es isch recht schnell gsi :-P
Noch em Renne bin ich no chli hocke bliebe und denn spöter zrugg an Flughafe wo mich vor luter Westler fast dä Schlag troffe het ;-)

Au das Wuchenend Mitte April han ich denn in Singapur verbrocht. Vor allem, well d'Myriam noch zwei Moenaet reise nomol zrugg cho isch und mir beschlosse hend, am Samstig Obig ä Ladies Night zmache und e Limo zmiete. 

Letscht Wuchenend hend mir am Fritig au frei gha und d'Michelle und ich sind noch Kuching floge. Das liht im malayische Teil vo Borneo. Mir sind also am Donstig Morge noch ihrem 30igste los (dementsprechend nöd grad am 6i am Morge ;-)) und hend denn gege Mittag im Hotel icheckt. Nochdem mir bim Zmittag d'Planig für di nöchste Täg gmacht hend, sind mir zum Schluss cho, dass es doch kei schlechti Idee wär mitere Massage z'starte… Gesagt getan und so isch dä Nomitag au zügig verbi gange. Am früene Obig sind mir denn is Städtli abä und es isch würkli uuh herzig. Mä chan am Fluss entlang flaniere, wos au es paar Restaurant het und eifach chli em Triebe zülüge. So sind mir no fein go esse und denn bi Zite is Bett.
Am Fritig sind mir denn I aller Herrgottsfrüehi ufgstande um in Bako National Park z'goh. De liht zwar ufere Halbinsle, isch aber nur über s'Wasser zuägänglich und au nur bi gwüssnä Wasserständ. Aber es het sich würklich glohnt! Borneo isch so unglaublich rich a Pflanze, Tier und Landschafte. Zerst sind mir go Tier beobachte und sind aschlüssend dur dä Jungle trekt. Denn sind mir vonere Bucht us mit em Schiff (also es isch meh e 6 Persone Nussschale gsi) no inä anderi wos super schöni Sandsteiformatione gha het.
Au am nöchste Tag sind mir bi Zitä usä zum inäs Schütgebiet für Orang Utans goh. Döt hend mir bidä Fütterig chöne zueluege und hend mindestens 10 frei lebendi Orang Utans i allne Grössene gseh. 

Es isch würklich e sehr idrücklichs Wuchenend gsi und ich hoffe das wird s'nöchste no toppe, denn es goht noch Angkor Wat. Ich freur mich scho sehr und melde mich nöchst Wuche wieder…

Bis bald,
Marina

...Bsuech & 4. letschts Wuchenend in Singpur

Nochere witere Arbeitswuche sind denn am 20. März min Papi und dä Nico z'Bsuech cho. Ich han mich sehr gfreut, v.a. well ich dä Nico scho soooo lang nümä gseh han :-)

Das mol isch dä A380 problemlos und pünktlich in Singapur glandet und ich han sie am Flughafe chöne empfange. Mir hend üs en schöne Tag gmacht mit Brunche, Schiffli fahre, Massage und indischem Nachtesse. Unglücklicherwiis isch a dem Suntig in Little India grad es Volksfest gsi, so dass mä sich echt vorcho isch wie in Kalkutta. Überall Lüt uf dä Stross und das im Land wo niemert nebet em Füssgängerstreife über d'Stross lauft :D Di nöchste Täg sind mir denn au no im arabische Viertel und im Eastcoast Park gsi und hend somit alli wichtige Essensstatione abdeckt ;-)

Letscht Wuchened isch denn sit Afang Februar mis erste Wuchenend ällei in Singapur gsi. Ich han dementsprechend eifach gmacht woruf i Lust gha han, bin chli idä Stadt umägloffe und han neui Sachä entdeckt, denn bin ich no zum Coiffeur und am Samstig Obig mit dä Ladies z'erst is Raffles Hotel zum Apero (isch echt en Oase) und denn noch Dempsey Hill go mexikanisch Esse. Ich muen sägä (und ich weiss, ich rede nur no über esse und trinke), die hend super Frozen Margharitas gmacht und s'Esse isch au usgezeichnet gsi.

Die kulinarisch Vielfalt do werd ich echt vermisse! Es git so viel verschiedes und au soo viel woni nonig probiert han - aber das schaff ich wohl au nümä alles…

Am Suntig sind mir denn am Obig no z'füfte go The Lion King luege im neue Musical Theater im Marina Bay Sands. Es isch würkli super gsi! Ich hets nie so guet erwartet, au s'Bühnebild und alles isch top gsi.
So, hüt hani viel z'verzelle gha. Jetzt wärs da aber au wieder mol gsi, bis di nöchste Abentür chömed…
 
So long,
M.

...Hong Kong

Nochere kurze Wuche bim schaffe, bin ich denn am Donstig Nomitag noch Hong Kong gfloge. Ä Wuche voranä het sich d'Isabelle no spontan entschiede zum mitcho, nochdem sie ghört het, dass ich wöt älleige goh. Mir sind (weg unterschiedliche Büchigszitpünkt / Flugprise) separat gfloge, aber beides mol im Abstand vonere halb Stund. Dä Flug uf Hong Kong isch glich no 4 Stund vo do und drum sind mir erst so am 8i am Obig im Hotel gsi. Mir sind denn natürli no kurz uf d'Piste öpis go esse und trinke, denn aber bi Zite is Bett. 

Am Fritig Morge hend mir denn noch em Zmorge i mim Lieblingskaffi in Hong Kong (viiiel besser wie Starbucks) d'Citygate Outlets gstürmt und sind z'erst mol chli go shoppe ;-) Am Nomitag sind mir denn getrennt unterwegs gsi, well d'Isabelle no isch go dä Big Buddha aluege und ich dä scho gseh han.

Am Obig sind mir denn zumä Thai in Soho (au das e super Empfehlig vo dä Regu - ich bin wieder mol seehr froh gsi, dass ich dur sie HK so guet han dörfe kennelerne). D'Regu und ich sind sicher scho drü Mol i däm Resti gsi, wells so fein isch. D'Isabelle und ich hend aber es Erlebnis vo dä bsundere Art gha das Mol. Öpä idä Mitti vom Hauptgang het drü Tisch witer uf eimol zwei agfange kreische und sind uf dä Stuehl gumpet (sind apropos au für di nöchst halb Stund nümä abächo ;-)). Mir hend denn mol glueget und irgendwenn e Ratte gseh durs Resti flitze. Mir hend denn mol d'Füess chli ufäghebet wo sie I üsi Richtig cho isch und hend denn witerverfolgt wie alli Girls (und z.T. au Männer) agfange hend kreische. Das Theater isch so lang witergange bis dä Manager gruefe het, sie sölled ufhöre schreie und ihm lieber sägä wo d'Ratte isch ;-) Die Arm isch sicher völlig verängstiget gsi. Nochdem sie denn gfange gsi isch het er gmeint "Welcome to Hong Kong" :-D Ich mein, das isch halt bi däm Klima do in Singapur und au in HK. Dä Unterschied isch nur, dass sie in Singi eifach Chemikalie sprützed und Rattenester ushebed, so dass mä fascht kei gseht.

Zrugg zum Wesentliche. S'Esse isch wieder mol sehr guet gsi und d'Drinks sind ufs Huus gange (inkl. am Reto sini, er isch spöter däzue gstosse). Aschlüssend sind mir noch Lan Kwai Fong in (tierlose) Usgang.

Am Samstig hät sich d'Isabelle mit ämä ehemolige Arbetskolleg troffe, wo jetzt in Shenzen schaffet und übere cho isch zum mit ihre Sightseeing machä. Mir isch das grad recht gsi, well ich jo die Hauptsehenswürdigkeite scho mindestens eimol gseh han und mich dä wichtegere Sachä han chöne widme. Jo, do dämit meini wieder mol Shopping und Esse. Es chan würkli niemert behaupte, dass ich mich do in Singapur nöd integriere! Da sind nämli DIE zwei zentrale Sache wo Singapureans mached wenns reised. Woni doh vo Bangkok zruggcho bin und sie mi gfroget hend wani gmacht han und ich gseit han ich hegi nünt gshoppet, sind's völlig schockiert gsi ;-) 

Am Obig sind mir denn uf Kownloon (aka the dark side) go d'Liechtshow luege und no inä Rooftop-Bar.
Am Suntig bin ich denn s'erste Mol i 4 Mönät (!) wieder im H&M gsi. Es isch komisch, wamer so vermisst vo dihei. Zum Bispil isch mir erst do ufgfalle, dass ich eigentlich no öpä Basics, Söcke etc. döt gang go hole und do mueni jedes umärenne und en Ladä sueche wo das hät. Aschlüssend sind mir denn no zum Jade Market und sust no chli in Kowloon umäspaziert. 

Am spötere Nomitag isch es denn scho wieder Zit gsi zums Gepäck go hole und üs uf dä Weg an Flughafe z'machä.

Happy Birthday to me...

Hoi mitenand
 
Lang ist's wieder her… Und es goht gar nümä  lang. Han festgstellt, dass ich noch guet 6 Wuche schaffe und denn isch scho fertig lustig. Also nöd ganz fertig, wie die meiste jo scho wüssed. Es paar Täg bevor ich ufhör schaffe, chunt dä Thierry mich no in Singapur go bsueche und aschlüssend gönd mir zämä noch Bali und uf d'Gili Islands (die sind zwüsched Bali und Lombok, au in Indonesie: http://www.gili-paradise.com/). 

Was mich viel gfroget hend isch, wie do d'Ereignis in Japan ufgfasst werded. Andersch als idä Schwiiz (wieni das via Zitige etc. mitbechum), isch do vor allem d'Betroffeheit über s'Erdbebe und di viele Opfer gross. Es wird zwar au do täglich über d'Entwicklig in Fukushima brichtet, aber es isch kei Angst umä das das in Singapur zunere Bedrohig chönt füehre. Oder wenn denn isch sie sehr minim.
Jetzt chönt mä als Argument is Feld führe, dass s'Zitige do sehr regierigstreu sind, was au stimmt. Und dass die Sach extra abägspielt wird. Aber us minere momentane Perspektive han ich viel meh Müh z'verstoh was idä Schwiz diesbezüglich momentan abgoht…

Aber jetzt zum agnehmere Teil. Wie ihr jo wüssed han ich das Johr amä Samstig dörfe min Geburtstag fiire und han dä au i volle Züg gnosse. Nochdem ich mit dä Müggi (wo über min Geburi ei Wuche do gsi isch, han mi riesig gfreut drüber) driinä gfiiret han und es paar Stunde Schlof, bin ich z'erscht mol standesgemäss mit dä Michelle, dä Müggi und ere Fläsche Prosecco go brunche (für die wos interessiert, eis vo mine Lieblingsrestis für Brunch, direkt am Singapore River: http://www.epicurious.com.sg/). Aschlüssend sind d'Michelle und ich für 2 Stunde in Spa verschwunde und hend üs e chli verwöhne loh (dä Spa isch e Neuentdeckig gsi, aber super: http://www.spafurama.com/home.php). Nochanä hend mir (natürlich ;-)) no öpis zum alegge brucht für dä Obig und d'Michelle het mich denn no im Raffles Hotel zumä Gläsli Champagner igladä. Das Hotel isch würkli wunderschön und wenn mä im Innehof im Café / Bar sitzt, isch es wie en anderi Welt (e türi wohlgmerkt ;-)). Denn hend mir fast e chli mösse pressiere, dass mirs no rechtzitig id Mani/Pedi gschafft hend, sind aber schlussendli innerhalb vo dä aständige Singapur-Verspötig blibe (für abgmachti Termin wöri säge isch das bis 10min z'spot, für Verabredige zum Dinner (über 2 Persone) chan das au gern mol 45min si. Leider lokalisiert mä sich au idä wengier positive Pünkt...). Schliessli hend mir denn nomol mösse id Mall renne, wells d'Kleider im erste Ladä nöd i üsere Grössi gha han. Jo, ich weiss ich bin en Armi :-P

Am Obig sind mir denn z'14te go esse. 4 Lüt hani voranä nöd kennt, aber das isch s'Positive do, mir sind alli sehr unkompliziert mit Lüt mitbringe worde. Well es het immer irgendöper Bsuech oder es chunt öper neu ah etc. Mir sind uf em Mount Sophia im Restaurant Chalk gsi (au do en Link: http://www.chalk.com.sg/chalk/). Ich hans voranä au nöd kennt, isch en Empfehlig vo dä Isabelle gsi und fein. Nochamä lange, gmütliche Esse sind mir denn (fast) alli witer ufs Helipad. Wie dä Name scho seit, isch das e Bar ufeme Helikopterlandeplatz (http://www.helipad.com.sg/v2/index.html). Die isch grad idä nöchi vom Clark Quay womer denn dä Obig im Chinaone (en Club mit Liveband http://www.chinaone.com.sg/index.html) usklinge loh hend.

Bangkok

Hoi mitenand 

Wie versproche chunt jetzt d'Fortsetzig vo mine Abendtür do in Singapur und Umgebig.
 
Nochdem mir am Mittwuch vo Vietnam zrugg cho sind, hani no schnell mösse wäsche, dohs am Fritig Obig scho wieder witer gange isch noch Bangkok. Jo, ich weiss, s'Lebe isch kein Sugus ;-)

Ich bin also am Fritig noch em schaffe mit dä Michelle uf Bangkok gfloge. Bis mir denn im Hotel gsi sind und icheckt hend, isch es au scho 1s gsi, also sind mir eifach no schnell uf di Hoteleige Rooftop Bar eis go zieh. Wo mir denn zu nächtlicher Stund hend wölle is Bett goh, hend mir festgstellt, das bi beidne (!) Better d'Lacke dreckig gsi sind. Und dass im Four Points by Sheraton' isch echt unglaublich. Und s'beste isch am nöchste Morge hend mirs gseit und womer wieder zruggcho sind, isch es immer no dreckig gsi!

Am Samstig Morge sind mir denn ufbroche und hend Bangkok erkundiget. Wagemütig wie mir sind, sind mir grad z'erst an Chao Phraya River abä und hend eis vo dänä chline Bötli gnoh zum zum Grand Palace & Wat Prakeaw ufä fahre. Hinder üs sind zwei Engländerinne ghocked, die hend bi jedem bitzli schaukle oder sprütze kreischt :-P Wo mir denn bim Palast acho sind, hend mir z'erst mol mösse go langi Hose / Rock kaufe. Mir hend zwar beidi gwüsst, dass mä das brucht zum ihne goh, ich bin aber dävo usgange, dass mä das au in Thailand, wie überall sust, chan bim Igang uslehne. Nochdem ich also für THB 200 no en Lumpe erstande han, isch es denn losgange…
Es isch würkli sehr idrücklich die Paläst und Tempel go ahluege und au wie guet sies erhaltet. Anderersits hani mi denn glich au mösse froge, wie viel Geld dass do in Unterhalt wohl inägsteckt wird und wie viel Lüt i dem Land echt Hunger hend…
Aschlüssend isch denn natürli no s'Klassische für Thailand passiert. Mir hend witer wölle zum Wat Pho und sind i diä Richtig am laufe gsi, wo üs eine vo dä 'Touristepolizei' agsproche het und gfroget het öb er üs chan helfe. S'End vodä Gschicht isch gsi, dass mir inäs Tuk-tuk verfrachtet worde sind und zumä völlig abglegne Bootssteg gfahre worde sind. Döt hends üs e völlig überrissni Tour abote, womer natürli dankend ablehnt hend und dävo gloffe sind. Alles in allem isch es halb so schlimm gsi, well mir es billigs Tuk-tuk gha hend (isch jo schliessli dä Köder gsi) und denn au grad bim Tempel gsi sind, wo mir jo hi hend wölle :D
Aber es hät üs glehrt, dass Thailand wad Touristeabzocki abelangt scho en anders Kaliber isch wie Vietnam oder Malaysia.
Noch dä Besichtigung vom Wat Pho und em Reclining Buddha wo d'Hauptattraktion isch, sind mir denn mit dä Fähre über zum Wat Arun (au dä The Temple of Dawn gnennt). Da isch würkli schön gsi. Nur leider han ichs gschafft zum mir bim bestiege resp. bim abstiege vo eim vo däne Türmli e Zerrig I beidne Oberschenkel z'hole. Jo, ich weiss, es isch mol wieder typisch. Aber ich han nochanä echt 3 Täg jedi nöd motorisiert Stägä mösse miide ;-) Dä Tigerbalsam (wo apropos ursprünglich us Singapur chunt) hät schliessli Abhilf brocht.
Mir sind denn vom Wat Arun zunäre stündige Schifflitour uf em Chao Phraya River und diverse Kanäl ufbroche. Isch super gsi, au die Konträst zwüsched grosse, riche Hüser und dä alte Holzhüttli z'gseh. Underwegs sind mir au no am Floating Market verbi cho, vo dem ich ehrli gseit meh erwartet han… Alles in allem isch es e sehr entspannti Stund gsi (abgseh vo dä Moment womer gmeint hend, s'Boot kippi oder fahri inä Wand).

Am Obig sind mir denn frisch gstrigglet und gstrählet is Vertigo go Znacht esse. Da isch d'Rooftop Bar vom Banyan Tree Hotel. Für die wos interessiert, do dä Link: http://www.banyantree.com/en/bangkok/dining/vertigo_and_moon_bar/ Isch würkli suupeer gsi! S'Esse isch sehr fein gsi und dä Service isch au top. Mir sind scho uf di 6i ufä und hend so au no chöne dä Sunneuntergang (und di entsprechende Mugge *g*) gnüsse :D Wells üs so guet gfalle het, sind mir denn nochem esse grad id Bar übere und hend no en Drink gnoh.
Und uf z'mol klammeret sich öpis a mim Gurt fest… Ich bin nämli grad unä anere 3, 4 Tritt Stäge ghocked… Es isch also di eint Kellnerin gsi, wo durabkeit isch und sich a mir ghebet het. Mir hend z'erst vermueted sie hegi sich öpis broche und hend sie drum grad uf üsi zwei Barhocker verfrachtet. Denn hend mir Is verlangt und glueget dass sie sich chli beruhigt. Es isch recht komisch gsi, einersits het sich niemert vom Personal sust um sie kümmeret und anderersits isch es ihne glaub sehr unagnehm gsi, dass sie jetzt uf üsne Stüehl hocked. Do d'Michelle druf beharrt het, dass sie sie zumä Arzt bringed, isch sie denn nochere halb Stund in Spitol verfrachtet worde. Sie sind üs denn au cho go säge, wo sie wieder zrugg gsi isch und d'Michelle isch denn no zu ihre abä und es isch nünt broche gsi.
So isch üsen Obig spektakulär und relativ spot z'End gange und mir sind zrugg is Hotel, wo üsi Bettlake immer no dreckig gsi sind…

Am Suntig hend mirs denn chli gmütlicher gnoh, hend gmüetlich zmörgelet und sind nochanä no chli go lädele.
 
Und denn sind mir scho idä letschte Wuche und dä Bricht folgt bald…
 
Liebi Grüess,
Marina